Ukrayna ruslar üçün viza tətbiq etdi
01.07.2022 15:46
Ukrayna hökuməti iyulun 1-dən Rusiya vətəndaşları üçün viza rejimi tətbiq etməyə başlayıb.
Ukrayna vizası almaq üçün Rusiya sakinləri Rusiyanın səkkiz şəhərindəki "VFS Global" viza mərkəzlərindən birinə müraciət edə bilər.
Təqdim olunan ərizələrə üçüncü ölkələrdəki Ukrayna diplomatları baxacaq.
Ukrayna Prezidenti Vladimir Zelenski iyunun ortalarında ruslar üçün viza rejimi elan edərkən demişdi ki, hökumət bu addımı milli təhlükəsizliyə misli görünməmiş təhdidlərə qarşı mübarizə çərçivəsində atıb.
Ukrayna tərəfi qeyd edib ki, viza ölkəyə girişə zəmanət vermir. Belə ki, son qərarı Ukrayna sərhədçiləri verəcək.
Rusiya Xarici İşlər Nazirliyi isə bildirib ki, mümkün cavab tədbirləri Rusiyanın milli maraqları çərçivəsində və humanitar əsaslar nəzərə alınmaqla görülə bilər.
Rusiya cari ilin fevralın 24-də Ukraynaya hücum edib. Bu müddət ərzində ölkənin bir sıra şəhər və qəsəbələri dağıdılıb, minlərə adam həlak olub, milyonlarla insan ölkədən qaçqın düşüb.
Beynəlxalq aləm Rusiyanın bu addımını pisləyir və qoşunlarını Ukraynadan çıxarmağa çağırır.
Rəsmi Moskva isə qonşu Ukraynaya qarşı apardığı müharibəni "xüsusi hərbi əməliyyat" adlandırır. Bundan başqa "müharibə" sözündən istifadə edənlər, "müharibəyə yox" deyənlər, o cümlədən Rusiya müdafiə nazirliyinin rəsmi məlumatlarından fərqli xəbərlər verən fərdlər və KİV-lər cəzalandırılır.
Azərbaycan daxil olmaqla, BMT üzvlərinin mütləq əksəriyyəti Krım yarımadası və Donbası Ukraynanın ərazisi olaraq tanıyır.
Ləman Qasımova
www.anews.az
Telegram
Bizi Teleqramda izləyin
Oxşar xəbərlər
Oxşar xəbərlər
Foto
Video
