BMT-dən çağırış - Qaraqalpaqıstan hadisələri araşdırılsın

Özbəkistanın Qaraqalpaqıstan muxtar respublikasında baş vermiş etirazlardakı ən azı 18 nəfərin ölümü müstəqil qaydada araşdırılmalıdır. Bununla bağlı Birləşmiş Millətlər Təşkilatının insan haqları ali komissarı Mişel Başelet rəsmi çağırış edib.

"Etirazlar zamanı qətllər də daxil ciddi zorakılıq olduqca narahatedicidir. Mən hakimiyyət orqanlarını son dərəcə təmkin göstərməyə çağırıram. Mən hakimiyyəti bu kontekstdə dövlət xəfiyyələrinin zorakılıqları da daxil, iddia olunan bütün cinayət əməllərinin dərhal, şəffaf və müstəqil təhqiqatına çağırıram”, - o bildirib.

Qarqalpaqıstan sakinləri bölgənin suverenliyinin məhdudlaşdırılması planlarına etiraz edirdilər. Ölkənin Baş prokurorluğu bildirib ki, Nukus şəhərində iğtişaşlar zamanı  18 nəfər ölüb,  500-dən çox  şəxsi hüquq-mühafizə orqanları saxlayıb. zbəkistan Milli Qvardiyası bildirir ki, saxlananların çoxu artıq sərbəst buraxılıb.
240 nəfərin xəsarət aldığı, onlardan 90-nın xəstəxanaya aparıldığı bildirilib. Özbəkistan prezidenti Şavkat Mirziyoyev iyulun 2-də deyib ki, Konstitusiyanın yeni mətnində Qaraqalpaqıstanın suverenliyi və Özbəkistanın tərkibindən çıxmaq hüququna dair müddəalar saxlanacaq. Prezident Mirziyoyev iyulun 3-dən avqustun 2-dək Qaraqalpaqıstanda fövqəladə vəziyyət rejimi tətbiq edib.

www.anews.az