Kahramanmaraşda 122 saatdan sonra 70 yaşlı qadın xilas edilib

Türkiyənin Kahramanmaraş şəhərində 70 yaşlı Menekşe Tabak 122 saat sonra dağıntlar altından xilas edilib.

Bu barədə "TRT Haber” məlumat yayıb.

Qadın dağıntılar altından çıxarılarkən "Dünya var?” deyə soruşub. Xilasedicilər ona cavabında bildirib: "Dünya var, xala, gəl!”

Fevralın 6-da ocağı Türkiyənin Kahramanmaraş şəhərinin Pazarcık rayonu olan 7,7 maqnitudalı və 9 saat sonra episentri eyni şəhərin Elbistan rayonu olan 7,6 maqnitudalı iki zəlzələ olub. Zəlzələ nəticəsində həlak olanların sayı 20 318 nəfərə çatıb, 91 511 nəfər yaralanıb. Güclü yeraltı təkanlardan sonra bölgədə 6,6 maqnitudayadək yüzlərlə afterşoklar qeydə alınıb. Təbii fəlakət Türkiyə və Suriyada böyük dağıntı və minlərlə itkilərə səbəb olub.

İki zəlzələ həmçinin Livan, Kipr, İraq, İsrail, İordaniya, İran və Misirdə hiss edilib.

Türkiyə Prezidenti Rəcəb Tayyib Ərdoğan ölənlərin xatirəsini anmaq üçün ölkədə 7 günlük matəm elan edib. Bundan başqa, ölkənin zəlzələ baş verən 10 şəhərində 3 aylıq fövqəladə vəziyyət elan olunub.