Fransa Nigerdəki səfirliyini bağlayır – AFP

Bu barədə AFP agentliyi diplomatik mənbələrə istinadən məlumat yayıb.

"Mövcud vəziyyəti nəzərə alaraq, biz yaxın vaxtlarda səfirliyimizi bağlamaq qərarına gəldik”, - diplomatik missiyadan bildirilib.

Agentliyin məlumatına görə, diplomatik missiya artıq orada işləyən yerli sakinlərin işdən azad edilməsinə və onlara təzminat ödənilməsinə başlayıb. Səfirliyin bağlanması ilə bağlı qərar diplomatik missiyanın normal fəaliyyət göstərə bilməməsi səbəbindən qəbul edilib.

Fransanın Nigerdəki səfiri Silven İtte isə sentyabrın 27-dən ölkənin paytaxtını tərk edib.

İyulun sonunda Nigerdə ​​prezident qvardiyasının bir qrup hərbçisi qiyam qaldıraraq prezident Məhəmməd Bazumun hakimiyyətdən uzaqlaşdırıldığını elan edib. Dövləti idarə etmək üçün qvardiya komandiri Əbdürrəhman Çianinin başçılığı ilə "Vətənin Qurtuluşu” Milli Şurası yaradılıb. Yeni hakimiyyətin qərarlarından biri də ekstremist qruplarla mübarizə üçün Nigerdə ​​hərbi kontingentin yerləşdirilməsi ilə bağlı Fransa ilə sazişlərin denonsasiyası olub.