Lavrov qəzaya uğrayan sərnişin təyyarəsindən danışıb

Rusiya ilə Azərbaycanın istənilən məsələləri həll etmək imkanı var, o cümlədən Azərbaycan Hava Yollarına məxsus təyyarənin iştirakı ilə baş verən təyyarə qəzası kontekstində. Bu barədə Rusiyanın xarici işlər naziri Sergey Lavrov rusiyalı diplomatların ötənilki fəaliyyətinin yekunlarına dair mətbuat konfransı zamanı danışıb.


"Bizim elə strukturlaşdırılmış əlaqələrimiz var ki, bizə bütün faktların öyrənilməsi əsasında istənilən məsələni operativ şəkildə həll etməyə imkan verir”, -  xarici siyasət idarəsinin rəhbəri qeyd edib.

Lavrov qeyd edib ki, qəzaya uğramış təyyarənin qara qutularının şifrəsi açılmış məlumatlar faciənin səbəbləri ilə bağlı KİV-də yayılan bəzi ilkin qənaətləri təsdiq etmir. Bununla bağlı o, tamhüquqlu araşdırmanın tamamlanmasını gözləməyə və media məkanında "ab-havanı gərginləşdirməməyə” çağırıb.


Bir gün əvvəl Azərbaycan Prezidenti İlham Əliyev də açıqlamasında bildirib ki, qəza ilə bağlı ilkin məlumatlar var, sadəcə qara qutunun oxunmasının yekunu gözlənilir. 
 
Dekabrın 25-də AZAL-a məxsus sərnişin təyyarəsi Qazaxıstanda qəzaya uğrayıb. Təyyarədə olan 67 nəfərdən 29 nəfəri sağ qalıb. 
 
Sərnişin təyyarəsi Rusiya tərəfindən vurulub. Rusiya prezidenti Vlodimir Putin baş verən qəzaya görə Azərbaycan Prezidentinə zəng edərək üzr istəyib. 
 
Baş verən qəzadan sonra dekabrın 26-da Azərbaycanda matəm günü elan edilib. 
 
Həmçinin qəzada olan 2 pilot və bir bələdçi Prezidentin sərəncamı ilə Milli Qəhrəman adını alıb. Qəzada sağ qalan digər iki bələdçi isə rəşadət ordeni ilə təltif olunub. 
 
Gülnar Nazimqızı 
www.anews.az