İran nüvə şəffaflığını sanksiyaların ləğvi ilə şərtləndirib

Tehranın nüvə obyektlərinə nəzarətin gücləndirilməsinə razılıq verməsi yalnız sanksiyaların ləğvi ilə mümkün ola bilər. Bunu İran xarici işlər naziri Abbas Əraqçi bildirib.

“Haqlarımızdan imtina etmirik, lakin sanksiyalar aradan qaldırılarsa, şəffaflığı artırmaq üçün addımlar ata bilərik,” –  o, SNN telekanalına müsahibəsində bildirib.

Əraqçi qeyd edib ki, uranın zənginləşdirilməsi məsələsi hələ də həll olunmayıb və danışıqlar ABŞ razılaşana qədər davam edəcək.

Onun sözlərinə görə, əgər Vaşinqton zənginləşdirmənin tam dayandırılmasında israr etsə, heç bir razılıq əldə olunmayacaq.

Nazir əlavə edib ki, İranın nüvə proqramı üzrə Birgə Hərtərəfli Fəaliyyət Planının (JCPOA) bəzi sanksiyalarla bağlı müddəaları yenidən nəzərdən keçirilməlidir.

“JCPOA hələ tam ölməyib, amma onu dirçəltmək mümkün deyil. Onu unutmaq lazımdır,” –  o qeyd edib.

Bu arada Ağ Evin sözçüsü Karolayn Levit bildirib ki, prezident Donald Tramp İranla danışıqların “doğru istiqamətdə irəlilədiyini” hesab edir. Tramp bu məsələni İsrailin baş naziri Benyamin Netanyahu ilə telefon danışığında da müzakirə edib.

CNN daha əvvəl xəbər verib ki, İsrail İrana qarşı nüvə infrastrukturuna zərbə endirmək imkanını nəzərdən keçirir. İranla ABŞ arasında beşinci danışıqlar raundu mayın 23-də Romada keçiriləcək.

N.Təbrizli