Şimali Koreya Çinə doğru ballistik raket atıb

Şimali Koreya Çinə doğru şimal-qərb istiqamətində 10-dan çox ballistik raket buraxıb. Bu barədə “Reuters” agentliyi hərbi mənbələrə istinadla məlumat yayıb.

Raketlərin Pxenyan yaxınlığında yerləşən Sunan bölgəsindən buraxıldığı bildirilib. Raketlərin Çinin ərazisinə çatıb-çatmadığı və ya havada zərərsizləşdirilib-zərərsizləşdirilmədiyi barədə hələlik rəsmi məlumat yoxdur.

Hadisə KXDR lideri Kim Çen Inın ordunu “müharibəyə hazır olmağa” çağırmasından dərhal sonra baş verib. Dövlət başçısı Koreya Xalq Ordusunun birinci qvardiya hərbi-hava diviziyasına məxsus aviapolku ziyarət edib və burada keçirilən təlimlərə şəxsən rəhbərlik edib.

Təlimlər zamanı Şimali Koreya hərbçiləri hava hücumundan müdafiə tapşırıqlarını, qanadlı raketlərin və kamikadze pilotsuz uçuş aparatlarının məhv edilməsini məşq ediblər. Təlimlərdə aviasiya, zenit-raket bölmələri, radiolokasiya və radioelektron mübarizə hissələri iştirak edib.