İsrail Fransa prezidentinin Fələstini tanımaq qərarını pisləyib

İsrailin baş naziri Benyamin Netanyahu və hökumət üzvləri Fransa prezidenti Emmanuel Makronun Fələstin dövlətini tanıyacağı barədə bəyanatına sərt reaksiya verib.

“Makronun 7 oktyabr qətliamından sonra Fələstin dövlətini tanımaq qərarı terroru mükafatlandırmaq deməkdir. Bu, Təl-Əvivin yanında ikinci bir İran peykinin yaranmasına gətirib çıxara bilər. Fələstin dövləti sülh vasitəsi deyil, İsrailin məhvinə xidmət edəcək bir platforma ola bilər”, –  Netanyahu X sosial platformasında bildirib.

İsrailin xarici işlər naziri Gideon Saar Makronun addımını “absurd və qeyri-ciddi” adlandıraraq bildirib ki, “bir bəyanatla münaqişəni həll etmək cəhdi qeyri-real və təhlükəlidir”.

Müdafiə naziri İsraël Katz Makronun sözlərini “terrora təşviq” kimi qiymətləndirib, milli təhlükəsizlik naziri İtamar Ben-Qvir isə istehza ilə “biz də Fransanı Fələstin dövləti kimi tanıyırıq” deyib.

Fransa prezidenti Emmanuel Makron X platformasında bəyan edib ki, Paris sentyabrda BMT Baş Assambleyasında rəsmi şəkildə Fələstin dövlətini tanıyacaq.

“Əsas məqsəd – dərhal atəşkəs, mülki əhaliyə yardım və regionun bərpasıdır”, – Makron qeyd edib.

N.Təbrizli