Tbilisidəki iğtişaşlarla bağlı 22 nəfər saxlanılıb

Gürcüstanda 4 oktyabrda Tbilisidə baş verən iğtişaşlarla əlaqədar 22 nəfər saxlanılıb.Bu barədə Gürcüstan daxili işlər nazirinin müavini Aleksandr Daraxvelidze bəyan edib.

Onun sözlərinə görə, şəxsiyyəti müəyyən edilən daha üç nəfərin axtarışı davam edir.

"Tbilisidə baş verən qanunsuz hadisələrlə bağlı Gürcüstan Cinayət Məcəlləsinin 4 maddəsi üzrə istintaq aparılır. Hazırda iş üzrə kompleks istintaq hərəkətləri davam edir", – deyə o bildirib.

Daha əvvəl iğtişaşlarda iştirak edən 13 nəfərin saxlanıldığı bildirilmişdi.

Oktyabrın 4-də Gürcüstan paytaxtında bələdiyyə seçkiləri günü müxalifətin mitinqi keçirilib. Təşkilatçıların aqressiv çağırışlarından sonra aksiya iğtişaşlara çevrilib, nəticədə onlarla polis əməkdaşı xəsarət alıb.