Ukraynda 300 mindən çox könüllü IT ordusu könüllüsü toplayıb

Ukrayna Rusiya ilə müharibənin ilk mərhələsində 300 mindən çox könüllüdən ibarət “IT ordusu” formalaşdırıb. Bu barədə Ukrayna Təhlükəsizlik və Müdafiə Şurası Aparatının İnformasiya Təhlükəsizliyi və Kibertəhlükəsizlik Xidmətinin rəisi, Milli Kibertəhlükəsizlik Koordinasiya Mərkəzinin katibi Nataliya Tkaçuk Bakıda keçirilən “Critical Infrastructure Defence Challenge 2025” (CIDC-2025) tədbirində bildirib.

Tkaçukun sözlərinə görə, bu könüllülər yalnız Ukraynadan deyil, digər ölkələrdən də qoşulub və həm müdafiə, həm də əks-kiberhücum əməliyyatlarında iştirak ediblər.

O, qeyd edib ki, Rusiya ilə kibermübarizə 2015-ci ilin sonunda Ukraynanın enerji infrastrukturuna edilən “Black Energy” virus hücumu ilə başlayıb: “O zaman 300 minə yaxın insan və müəssisə bir neçə saatlıq işıqsız qalmışdı. Həmin hadisə kiberhücumların fiziki silahlarla birgə istifadə olunduğu ilk nümunə idi",- o bildirib.

Tkaçuk əlavə edib ki, Rusiyanın Ukraynaya qarşı hərbi təcavüzü fonunda kiberhücumlar müharibənin daimi tərkib hissəsinə çevrilib.

Gülnar Nazimqızı