ABŞ Venesuelaya neft hasilatının bərpası üçün sərt şərtlər irəli sürüb

ABŞ prezidenti Donald Trampın administrasiyası Venesuelaya neft sənayesinin yenidən işə salınması və əlavə neft hasilatına icazə verilməsi müqabilində sərt siyasi və iqtisadi şərtlər təqdim edib. Bu barədə American ABC News məlumatlı mənbələrə istinadən xəbər verib.

Məlumata görə, Vaşinqtonun əsas tələblərindən biri Çin, Rusiya, İran və Kuba nümayəndələrinin Venesueladan dərhal çıxarılması, eləcə də Karakasın bu ölkələrlə bütün iqtisadi əlaqələri kəsməsidir. Digər əsas şərt isə Venesuelanın neft hasilatı sahəsində yalnız ABŞ-la əməkdaşlığa razı olması və ağır xam neft satışında Amerika bazarına üstünlük verməsidir.

ABŞ dövlət katibi Marko Rubio qanunvericilərlə qapalı görüşdə bildirib ki, Vaşinqton Venesuelanı bu şərtləri qəbul etməyə məcbur etmək üçün kifayət qədər vasitələrə malikdir. Onun sözlərinə görə, Venesuelanın neft tankerləri hazırda tam doludur və satış imkanlarının məhdudlaşması ölkəni maliyyə iflası həddinə gətirib.

Rubio qeyd edib ki, Karakasın təxminən iki həftəlik vaxtı qalıb və bu müddətdə neft ehtiyatları satılmasa, ölkə tam müflis ola bilər.

Senatın Silahlı Qüvvələr Komitəsinin sədri Rocer Viker də Ağ Evin strategiyasının Venesuelanın neft ehtiyatları üzərində nəzarətin gücləndirilməsinə yönəldiyini təsdiqləyib. O bildirib ki, plan ABŞ qoşunlarının Venesuelaya yerləşdirilməsini nəzərdə tutmur, lakin neft daşıyıcıları və tankerlərin hərəkəti üzərində ciddi nəzarəti ehtiva edir.

Vikerin sözlərinə görə, ABŞ Venesuela neftinin Havanaya daşınmasına və ya Çinə güzəştli şərtlərlə verilməsinə imkan verməyəcək. O əlavə edib ki, Venesuela artıq neft istehsalını artırmaq imkanına malik deyil, çünki mövcud ehtiyatları saxlamaq üçün ölkədə kifayət qədər infrastruktur yoxdur.

Gülnar