Almaniya XİN rəhbəri ABŞ-da BMT-nin baş katibi ilə görüşəcək

Almaniyanın xarici işlər naziri Yohann Vadeful ABŞ-a işgüzar səfəri çərçivəsində Nyu-Yorkda BMT-nin baş katibi Antonio Quterreş ilə görüşməyi planlaşdırır.Bu barədə o, Vaşinqtona uçuşdan əvvəl jurnalistlərə açıqlamasında deyib.

Nazir bildirib ki, “Almaniya üçün beynəlxalq tərəfdaş kimi etibarlılıq, şübhəsiz ki, beynəlxalq hüquqa və beynəlxalq əməkdaşlığa sadiqliyi də əhatə edir. Məhz buna görə Vaşinqtonda apardığım danışıqlardan sonra Nyu-Yorkda BMT-nin baş katibi Antonio Quterreş ilə də görüşəcəyəm.

ABŞ prezidenti Donald Trampın Qrenlandiya ilə bağlı bəyanatlarına münasibət bildirən Almaniya XİN rəhbəri NATO çərçivəsində təhlükəsizlik üçün ümumi məsuliyyətin vacibliyini vurğulayıb. “Əlbəttə, yaxın tərəfdaşlar arasında belə müxtəlif baxışlar yarana bilər. Lakin bu, ümumi mənzərəni gözdən qaçırmağımıza səbəb olmamalıdır”, – deyə o qeyd edib.

“Fikir ayrılıqları olan məsələlərdə biz bu ziddiyyətləri dialoq yolu ilə həll etmək istəyirik ki, sülh və təhlükəsizliklə bağlı ümumi məsuliyyətimizi yerinə yetirək. Bu yanaşma ilə Vaşinqtonda amerikalı həmkarım Marko Rubio ilə müzakirələr aparacağam. Bizim məsuliyyətimizə, xüsusilə, NATO-nun adını daşıyan və ümumi təhlükəsizliyimiz üçün strateji əhəmiyyət kəsb edən Şimali Atlantika regionunun təhlükəsizliyi daxildir”, – deyə nazir bildirib.

Vadeful vurğulayıb ki, bu məsələlər NATO çərçivəsində birgə müzakirə olunmalıdır: “NATO üzrə bütün müttəfiqlərin qanuni maraqları, eləcə də region sakinlərinin mənafeləri diqqət mərkəzində olmalıdır. Bu, təbii ki, Qrenlandiyaya və onun xalqına da aiddir”.