Tramp Pəhləviyə dəstək barədə danışmağın hələ tez olduğunu deyib

İranın vəliəhd şahzadəsi Rza Pəhləvinin ölkə daxilində dəstək qazana biləcəyi barədə danışmaq hələ tezdir. Bu barədə ABŞ prezidenti Donald Tramp bildirib.

“Onun xoş biri olduğu görünür, lakin öz ölkəsində necə qarşılanacağını bilmirəm,” — Tramp Reuters agentliyinə müsahibəsində deyib.

Trampın sözlərinə görə, Vaşinqton vəziyyəti təhlil etməkdə davam edir və hazırda nəticə çıxarmaq tezdir.

“Onun rəhbər rolda qəbul ediləcəyini bilmirəm. Əgər qəbul etsələr, mən etiraz etmərəm,” —  o əlavə edib.

İranda mümkün hakimiyyət dəyişikliyindən danışan Tramp bildirib ki, “istənilən rejim süqut edə bilər”.

Daha əvvəl Axios nəşri ABŞ prezidentinin xüsusi elçisi Stiven Uitkoffun yanvarın 10–11-də Pəhləvi ilə qapalı görüş keçirdiyini yazıb.

Bu, etirazlar başlayandan sonra Tramp administrasiyası ilə İran müxalifəti arasında ilk yüksək səviyyəli təmas olub.

Yanvarın 12-də Tramp İranla ticarət aparan bütün ölkələrə qarşı ABŞ tərəfindən 25 faiz rüsum tətbiq ediləcəyini açıqlayıb.

N.Təbrizli