Tramp: Mənə Nobel mükafatı verilmədiyi üçün yalnız sülh haqqında düşünə bilmərəm

ABŞ prezidenti Donald Trump Qrenlandiyaya nəzarəti ələ keçirmək niyyətini Nobel Sülh Mükafatını almaması ilə əlaqələndirərək, artıq “yalnız sülh haqqında düşünməyə borclu olmadığını” bildirib.

NBC News-a verdiyi müsahibədə Tramp Qrenlandiyanı ilhaq etmək üçün güc tətbiq edib-etməyəcəyini deməkdən imtina edib. O, razılıq əldə olunmayacağı təqdirdə Avropa ölkələrinə tariflər tətbiq edilə biləcəyi ilə bağlı əvvəlki təhdidlərini də təkrarlayıb.

Bundan əvvəl Tramp Norveçin baş naziri Jonas Gahr Støre-yə göndərdiyi mesajda ölkəsinin onu Nobel Sülh Mükafatına layiq görməməsini tənqid edib.

“Ölkənizin mənə səkkiz müharibəni dayandırdığım üçün Nobel Sülh Mükafatını verməmək qərarına gəldiyini nəzərə alsaq, artıq yalnız sülh haqqında düşünməyə borclu deyiləm. Sülh həmişə ən vacib olacaq, lakin indi ABŞ üçün nəyin yaxşı və düzgün olduğu barədə də düşünə bilərəm”, – Tramp mesajında qeyd edib.

Qrenlandiya  Danimarkanın muxtar ərazisi hesab olunur və Trampın son açıqlamaları Avropa paytaxtlarında narahatlıqla qarşılanır. ABŞ və Avropa rəsmiləri isə məsələ ilə bağlı şərh verməyiblər.

Gülnar