Pezeşkian Minabda məktəbə zərbəni pislədi: 64 nəfər ölüb, 93 yaralı var

İran prezidenti Məsud Pezeşkian ABŞ və İsrailin İranın cənubunda yerləşən Minab şəhərində ibtidai məktəbə endirdiyi zərbəni pisləyib.

Prezidentin mətbuat xidmətinin yaydığı bəyanatda bildirilir ki, hücum nəticəsində əsasən məktəbin şagirdləri olmaqla 64 nəfər həlak olub.

“Bu vəhşilik aktı təcavüzkarların bu torpaqda törətdiyi saysız-hesabsız cinayətlərin salnaməsində daha bir qaranlıq səhifədir və xalqımızın tarixi yaddaşından heç vaxt silinməyəcək. Mən bu qeyri-insani əməli qətiyyətlə pisləyir, həlak olanların ailələrinə, Minab sakinlərinə və bütün İran xalqına dərin hüznlə başsağlığı verir, onların kədərinə şərik olduğumu bildirirəm”, – bəyanatda qeyd olunur.

Yerli hakimiyyət orqanlarının məlumatına görə, Minabda məktəbə endirilən zərbə nəticəsində azı 64 nəfər həlak olub, 93 nəfər yaralanıb.