İrəvanda Avropa Siyasi Birliyinin 8-ci sammiti başlayır

Ermənistan paytaxtında Avropa Siyasi Birliyi sammitinin 8-ci zirvə görüşü başlayır.

İştirakçılar sammitin keçirildiyi İdman və Konsert Kompleksinə gəlməyə başlayıblar. Tədbirdə onlarla Avropa ölkəsinin dövlət və hökumət başçıları, eləcə də beynəlxalq təşkilatların rəhbərləri iştirak edir.

Sammitə ilk dəfə olaraq qeyri-Avropa ölkəsinin lideri – Kanadanın Baş naziri Mark Karni dəvət olunub.

Zirvə görüşü “Gələcəyin qurulması: Avropada birlik və sabitlik” mövzusu altında keçirilir.
Avropa Siyasi Birliyinin ilk sammiti 6 oktyabr 2022-ci ildə Praqada baş tutub. Sonrakı görüşlər Kişinyov, Qranada, Oksfordşir, Budapeşt, Tirana və Kopenhagendə keçirilib.

Platforma təxminən 50 Avropa ölkəsinin liderlərini bir araya gətirərək təhlükəsizlik, sabitlik və rifah məsələləri üzrə siyasi dialoq və əməkdaşlığı təşviq etməyi hədəfləyir. Zirvə görüşləri mövcud beynəlxalq institutları əvəz etmir, lakin liderlər üçün əlavə müzakirə və koordinasiya imkanı yaradır.

Gülnar Nazimqızı