AİB-dən çıxmadan Aİ-yə getmək mümkün deyil - Zaxarova

Rusiya xarici işlər nazirliyinin sözçüsü Mariya Zaxarova Ermənistanın həm Avrasiya İqtisadi Birliyində qalmaq, həm də Avropa İttifaqına inteqrasiya etmək istəyini tənqid edib.

Sputnik radiosuna müsahibəsində Zaxarova Ermənistan rəhbərliyinin mövqeyini hava limanında marşrutunu dəyişmək istəyən sərnişinə bənzədib.

“Təsəvvür edin ki, bütün qeydiyyat və nəzarət prosedurlarından keçmisiniz, təyyarəyə minmək üzrəsiniz. Bu zaman sərnişinlərdən biri qəfildən deyir ki, əvvəl seçdiyi istiqamətə yox, başqa bir nöqtəyə getmək istəyir”, – o bildirib.

Zaxarova qeyd edib ki, Ermənistanın AİB-də qalaraq Aİ-yə qoşulmaq niyyəti “iki stulda oturmaq cəhdi”ndən də artıqdır.

“Əgər B nöqtəsindən C nöqtəsinə getmək istəyirsinizsə, bu mümkündür. Amma bunun öz qaydaları və logistikası var. Seçiminizi dəyişmək istəyirsinizsə, bunun da mədəni və aydın yolu mövcuddur”, –  Rusiya XİN sözçüsü vurğulayıb.

Onun sözlərinə görə, hər hansı inteqrasiya modelinin dəyişdirilməsi açıq və ardıcıl qərar tələb edir, eyni vaxtda fərqli inteqrasiya platformalarında qalmağa çalışmaq isə suallar yaradır.

Gülnar Nazimqızı