Moskvada raket həyəcanı elan edilib

Rusiyanın Moskva vilayətində raket təhlükəsi ilə bağlı xəbərdarlıq elan edilib, bölgədə internet xidmətlərində fasilələrin yarana biləcəyi bildirilib.

“Ehtiyatlı olun, Moskva” Telegram kanalı “112 MO” təcili xəbərdarlıq tətbiqinə istinadən yazıb ki, Moskva vilayəti üzrə rəsmi sistem raket həyəcanı siqnalı verib.

Sakinlərə təhlükə zamanı binalarda və ya yaxınlıqdakı sığınacaqlarda qorunmaq tövsiyə olunub. Daha sonra həyəcan siqnalının ləğv edildiyi bildirilib.

Məlumata görə, təxminən bir saat ərzində Rusiyanın 12 bölgəsində raket təhlükəsi ilə bağlı xəbərdarlıq elan edilib.

Moskva meri Sergey Sobyanin bildirib ki, Rusiya Müdafiə Nazirliyinin hava hücumundan müdafiə qüvvələri son 24 saat ərzində paytaxta doğru hərəkət edən 84 pilotsuz uçuş aparatını məhv edib.

Bu, son iki il ərzində Moskvanı hədəf alan ən böyük dron hücum cəhdlərindən biri kimi qiymətləndirilib. Rusiya tərəfi hadisə ilə bağlı əlavə təfərrüatlar açıqlamayıb.

Aytac