İsti hava Eyfel qülləsini əyir və uzadır

Fransada iyunun sonlarında müşahidə olunan güclü istilər Parisin simvollarından olan Eyfel qülləsinin hündürlüyünün müvəqqəti dəyişməsinə səbəb olub.

RTL radiostansiyasının məlumatına görə, yüksək temperaturun təsiri altında qüllənin metal konstruksiyası istilik nəticəsində genişlənir. Bu isə tikilinin hündürlüyünün bir neçə santimetr artmasına və yuxarı hissəsinin cüzi şəkildə əyilməsinə səbəb ola bilir.

1889-cu ildə Dünya Sərgisi üçün inşa edilən Eyfel qülləsinin ilkin hündürlüyü 300 metr olub. Hazırda, 2022-ci ildə quraşdırılmış 6 metrlik radio antenası ilə birlikdə qüllənin ümumi hündürlüyü 330 metr təşkil edir.

Mühəndis, memar və tarixçi Bertrand Lemoine bildirib ki, havanın temperaturu -10°C-dən +40°C-yə qədər dəyişdikdə qüllənin hündürlüyü təxminən 10 santimetr arta bilər. Onun sözlərinə görə, hər 10 dərəcə temperatur artımı metal konstruksiyanın təxminən 2 santimetr genişlənməsinə səbəb olur.

Ekspert qeyd edib ki, günəş şüalarının qülləni qeyri-bərabər qızdırması nəticəsində onun yuxarı hissəsində cüzi əyilmə yaransa da, bu dəyişikliklər adi gözlə demək olar ki, hiss olunmur.

Lemoine vurğulayıb ki, hətta ekstremal istilər də Eyfel qülləsinin təhlükəsizliyinə risk yaratmır. Onun sözlərinə görə, qüllənin inşa olunduğu dəmir yalnız təxminən 1 500°C temperaturda əridiyi üçün yay aylarında müşahidə olunan istilər konstruksiyanın dayanıqlığına təsir göstərmir.

Gülnar Nazimqızı