ABŞ və İsrail hücumları zamanı İranın gündəlik qaz istehsal gücü 230 milyon kubmetr azalıb

ABŞ və İsrailin hücumları zamanı İranın təbii qaz istehsal gücü gündəlik təxminən 230 milyon kubmetr azalıb. Bu barədə İran hökumətinin sözçüsü Fatma Mohacerani bildirib.

Tehranda keçirdiyi mətbuat konfransında sözçü qeyd edib ki, 40 gün davam edən hərbi əməliyyatlar ölkənin qaz istehsalı infrastrukturuna ciddi ziyan vurub və nəticədə istehsal gücündə əhəmiyyətli azalma qeydə alınıb.

Mohacerani qaz istehsalındakı azalmanın enerji sektoruna təsirlərinin aradan qaldırılması istiqamətində işlərin davam etdiyini bildirib.

İran dünyanın ən böyük təbii qaz ehtiyatlarına malik ölkələrdən biridir və daxili enerji tələbatının böyük hissəsini qaz hesabına ödəyir. Son aylarda regionda hərbi gərginliyin artması enerji infrastrukturunun təhlükəsizliyi ilə bağlı narahatlıqları da gücləndirib. ABŞ və İsrailin zərbələri nəticəsində İranın enerji obyektlərinə dəyən zərərin miqyası ilə bağlı tərəflər müxtəlif məlumatlar açıqlayırlar.