Tramp: İranla danışıqlar bu gün başlayacaq

ABŞ Prezidenti Donald Tramp İranla yeni danışıqların avqustun 3-də keçiriləcəyini açıqlayıb, lakin mümkün razılaşma üçün hər hansı son tarix müəyyən etməyib.

Nyu-Cersi ştatında həftəsonu keçirdikdən sonra Vaşinqtona qayıdan Tramp jurnalistlərə bildirib ki, danışıqlar bazar ertəsi günortadan sonra başlayacaq. O, görüşün keçiriləcəyi məkan və iştirakçıların tərkibi barədə məlumat verməyib.

ABŞ prezidenti bildirib ki, hərbi qarşıdurma əvəzinə diplomatik həllə üstünlük verir.

"Mən razılaşma əldə etməyi üstün tutardım. İnsanları öldürmək istəmirəm, çünki insanlar ölür, çoxlu insan ölür və biz bunu istəmirik", – deyə Tramp vurğulayıb.

Tramp əlavə edib ki, ABŞ-ın planlaşdırdığı genişmiqyaslı hərbi əməliyyat həyata keçirilməyib.

"Bu, böyük bir hücum olacaqdı. Onlar bunu etməməyi xahiş etdilər. Qonşuları da eyni şeyi dedilər. Görək razılığa gələ biləcəyik, ya yox", – deyə o bildirib.