Satışa çıxarılan Nobel mükafatını kimin aldığı bəlli olub - FOTOLAR

DNT-nin quruluşunu kəşf etdiyi üçün 1962-ci ildə Nobel mükafatı alan amerikalı elm adamı Ceyms Uatson keçən həftə mükafatını satmışdı. ANN.Az xəbər verir ki, mükafatı satın alan rusiyalı iş adamı Alişer Usmanov olmuşdu. Bu günlərdə o, "Mükafat  Uatsonun haqqdır" -  söyləyərək onu geri qaytaracağını bəyan edib.
 
Uatson, DNT-nin ikiqat spirallı quruluşunu kəşf etdiyi üçün 1962-ci ildə layiq görüldüyü Nobel mükafatınin qızıl medalını ötən həftə Nyu Yorkdakı Christies hərrac evində açıq satışa çıxarmışdı. Mükafat, 4.8 milyon dollara alıcı tapmışdı.
 
Telefonda verdiyi son təkliflə mükafatı satın alan şəxsin adı isə açıqlanmamışdı.
 
Rus iş adamı Usmanov yazılı açıqlamasında Nobel mükafatını satın alan şəxsin özü olduğunu bəyan edib.
 
Uatson mükafatı maddi çətinliklər səbəbindən satışa çıxardığı bildirmişdi. Həyatda olan Nobel mükafatçısınin öz medalını satışa çıxarması dünyada birinci dəfə idi.

86 yaşlı Uatson satışdan əldə etdiyi qazancın bir hissəsini yardım fondlarına və elm sahəsindəki işlərə bağışlayacağını bildirmişdi.
 
Mükafatı satın alan rusiyalı iş adamı Usmanov  - "Mənim düşüncəmə görə, yüksək səviyyəli bir elm insanının uğurlarının təqdiri olaraq verilən bir medalı satmaq məcburiyyətində qalması qəbul edilməzdir" -  deyib.
 
Usmanov açıqlamasında əlavə edib ki: "Ceyms Uatson insanlıq tarixinin ən böyük bioloqlarından biridir və DNT quruluşu ilə bağlı kəşfinə verilən mükafat ona məxsus olmalıdır".
 
"Forbes" jurnalına görə əmlakı 15.8 milyard dollara çatan Usmanov həmçinin ingilislərin "Arsenal" futbol komandasının da səhmdarlarındandır. Usmanov keçən il "Sunday Times" qəzeti tərəfindən İngiltərənin ən varlı adamı elan edilmişdi.

ANN.Az