Nazirdən faşistsayağı çağırış: "Baltalamaq lazımdır"

Fələstin hökuməti İsrailin xarici işlər naziri Libermandan Beynəlxalq Cinayət Məhkəməsinə şikayət edir.

ANN.Az xarici ölkə mediasına istinadən xəbər verir ki, İsrailin xarici işlər naziri Aviqdor Liberman lideri olduğu Evimiz İsrail Partiyasının Herzliya şəhərində təşkil etdiyi mitinqdə "Bizə qarşı olan bütün ərəblərin başınıbalta ilə kəsmək lazımdır. Yoxsa bu torpaqlarda İsrail deyə bir şey qalmaz" - fikrini səsləndirib. O, "İsrailli ərəblərdən bizim yanımızda duranlar hər şey əldə edəcəklər. Fələstinin bayrağını qaldıranlar buradan getsinlər, mən onları Əbu Mazinə (Fələstinin dövlət başçısı Mahmud Abbas nəzərdə tutulur - red.) hədiyyə etməyə hazıram və bundan da məmnunluq duyuram".

İsrail nazirinin faşistsayağı açıqlaması Fələstin dövlətində hiddət yaradıb və hökumət siyasət adamının, vəzifə daşıyan br şəxsin nifrətlə söylədiyi bu fikirlərdən Beynəlxalq Cinayət Məhkəməsinə şikayət etməyi qərarlaşdırıb: "Bütün ölkələri və İsrail hökumətini insaniyyətə təhdid olan İŞİD-çi Libermanı tutmağa və boykot etməyə çağırırıq".

Fələstinin xarici işlər nazirliyinin yazılı bəyanatında daha sonra deyilir: "Bir İsrail diplomatı olaraq nazir postunu tutan Aviqdor Liberman daxilində saxladığı barbar duyğularını ictimaiyyət qarşısında açıqlamaqdan çəkinməyib. Fələstin hökumətinin Beynəlxalq Cinayət Məhkəməsinə ünvanlayacağı şikayət məktubunda bu sözlər olduğu kimi əlavə ediləcək. Biz Beynəlxalq Cinayət Məhkəməsindən Liberman haqqında həbs qərarının çıxarılmasını tələb edirik".

ANN.Az