NATO gəmiləri Qara dənizi tərk etdi

ANN.Az Lent.az-a istinadən xəbər verir ki, alyansın hərbi gəmiləri Bosfor boğazını keçərək Aralıq dənizinə çıxıb. Martın 20-də NATO-nun hərbi-dəniz komandanlığı alyansın İkinci daimi dəniz qruplaşmasının (SNMG2) Rumıniya Hərbi Dəniz Qüvvələri ilə birgə keçirdiyi təlimləri başa vurduğunu və daimi patrul yerinə - Aralıq dənizinə qayıdacağını bildirmişdi. Xatırladaq ki, martın 3-4-də NATO-nun 5 hərbi gəmisi - Vicksburg raket kreyseri, Kanadanın Fredericton, Türkiyənin Turgutreis, İtaliyanın Aliseo və Almaniyanın Spessart gəmiləri Qara dəniz akvatoriyasına daxil olmuşdu. Bu gəmilər Bolqarıstanın Varna limanına da yan almışdılar. Daha sonra NATO gəmiləri Rumıniyanın Konstantsa limanına gəliblər. Burada onların təliminə Rumıniyanın Marasesti freqatı, iki raket daşıyan kater, 3 MİQ-21 hərbi təyyarəsi də qoşulub.

 

İkinci daimi dəniz qruplaşmasının (SNMG2) komandanı Bred Uilyamson bildirib ki, təlimlər zamanı Rusiya Hərbi Dəniz Qüvvələrinin gəmilərinin onlara yaxınlaşmaq cəhdi müşahidə olunub. Onun bildirdiyinə görə, NATO gəmilərinin təlimləri zamanı Rusiyanın SU-27 və SU-30 qırıcılarının uçuşları da müşahidə olunub. Rumıniya HDQ qərargahının nümayəndəsi Korneliu Pavel bildirib ki, təlimlər zamanı Rusiyaya məxsus İl-20 kəşfiyyat təyyarəsi akvatoriya üzərində uçuşlar həyata keçirib.

 

Ukraynanın şərqində böhran başlayandan Qara dənizdə vaxtaşırı ABŞ və NATO gəmiləri müşahidə olunur. Ancaq razılaşmaya görə, Qara dəniz ölkəsi olmayan dövlətlərə məxsus hərbi gəmilər bu akvatoriyada 21 gündən artıq qala bilməz.