İstanbul-Lissabon təyyarəsi havaya qalxdıqdan bir qədər sonra geri döndü

Bu gün İstanbul-Lissabon reysi ilə uçan Türk Hava Yollarına (THY) məxsus sərnişin təyyarəsi havaya qalxdıqdan sonra bir qədər sonra geri dönüb.

ANN.Az APA-ya istinadən xəbər verir ki, buna səbəb təyyarədə sahibsiz əşyanın aşkarlanması olub. Bu barədə pilota məlumat verildikdən sonra o, mülki aviasiya qaydalarına uyğun olaraq İstanbul hava limanına geri dönmək üçün dispetçerdən icazə istəyib. Təyyarənin geri dönməsinə icazə verilib. 170 sərnişin başqa təyyarə ilə Lissabona yola salınıb.

Maraqlıdır ki, son günlər Türk Hava Yollarının həyata keçirdiyi daha iki aviareysdə oxşar problem yaranıb. Belə ki, martın 29-da İstanbul-Tokio təyyarəsinin tualetinin qapısında "C 4 Cargo” yazısı aşkarlandıqdan sonra təyyarə Türkiyənin Sinop vilayətinin üzərindən İstanbula geri qayıdıb. (C 4 partlayıcı maddə növüdür.) Martın 30-da isə İstanbuldan Braziliyanın San Paolo şəhərinə uçan təyyarənin tualetində "bomba” sözü yazılmış kağız parçası tapılıb. Təyyarə Mərakeşin Kasablanka şəhərinə təcili eniş edib.    


www.ann.az