Azərbaycanda Media və Yayım Şurası yaradılır

Azərbaycanda Audiovizual Şuranın adı dəyişdirilərək Media və Yayım Şurası adlandırılacaq və qurumun media sahəsində səlahiyyətləri genişləndiriləcək. Bu, “Dövlət qulluğu haqqında” və “Media haqqında” qanunlara təklif edilən dəyişikliklərdə əksini tapıb.

Layihəyə əsasən, yeni qurum media və yayım sahəsində səlahiyyətli dövlət orqanı olacaq. Şura Media Reyestrini aparacaq, media subyektlərinə reyestr şəhadətnaməsi, jurnalistlərə isə jurnalist vəsiqəsi verəcək.

Sənədə görə, media subyektləri hər il dekabrın 30-dək təsisçiləri, iştirakçıları və idarəetmə orqanlarının rəhbərləri barədə məlumatları Şuraya təqdim etməli olacaqlar.

Şuranın səlahiyyətlərinə media savadlılığının artırılması, media subyektlərinin iqtisadi dayanıqlığının gücləndirilməsi, jurnalistlərin peşəkarlığının artırılması məqsədilə təlim və müsabiqələrin təşkili, eləcə də media sahəsində araşdırmaların aparılması daxil edilir.

Bundan başqa, qurum dezinformasiyaya qarşı mübarizə, sosial şəbəkələrdə rəqəmsal məzmunun təhlili və audiovizual məhsullar üzrə dövlət sifarişçisi kimi fəaliyyət göstərmək səlahiyyəti əldə edəcək.

Gülnar Nazimqızı