Səfir: UFAZ-ın diplomu ilə məzunlar gələcəkdə asanlıqla iş tapacaqlar - FOTOLAR

Oktyabrın 27-də Beynəlxalq Muğam Mərkəzində keçirilən tədbirdə Fransanın Azərbaycandakı səfiri Aurelia Buşez Təhsil Nazirliyinin Elm, ali və orta ixtisas təhsili şöbəsinin müdiri Yaqub Piriyev, Azərbaycan Dövlət Neft və Sənaye Universitetinin (ADNSU) rektoru Mustafa Babanlı, Strasburq Universitetinin nümayəndəsi Filipp Turek, UFAZ-ın professor-müəllim heyəti və KİV nümayəndələri iştirak edib.

 

Fransanın ölkəmizdəki səfiri Orelia Buşez tədbiri çıxış sözü ilə açaraq bildirib ki, Fransa-Azərbaycan Universitetində 141 azərbaycanlı tələbə təhsil alır və UFAZ-ın tələbələri üçün Fransada olduğu kimi eyni şərait yaradılıb:

"UFAZ-ın tələbələri Strasbuq Universitetinin tədris proqramı üzrə təhsil alırlar və Fransada olduğu kimi eyni diplomlar alacaqlar. Bu diplomlar peşəkar dəyərə malikdir. Buranın diplomu ilə məzunlar gələcəkdə asanlıqla iş tapa biləcəklər. UFAZ-da tələbələr ciddi seçimdən sonra bura qəbul olunaraq, keyfiyyətli təhsil alırlar. Burada Strasburq Universitetindən gələn müəllimlər dərs keçir. UFAZ-da 13 yerli müəllim dərs deyir və onların hər biri xaricdə təhsil alıblar. Onlardan ikisi Fransada təhsil alan müəllimlərdir”.

Səfir Aureliya Buşez bildirib ki, Strasbuq Universiteti dünyada kifayət qədər məşhur təhsil müəssisələrindən biridir. 2016-cı ildə Strasburq Unuiversitetinin professoru Jan Pyer Sovaj "molekulyar maşınların layihələndirilməsi və sintezi”nə görə, kimya elmi üzrə Nobel mükafatına layiq görülüb. Səfir əlavə edib ki, UFAZ-ın tələbələrinə təqdim edilən Strasburq Universitetinin kartları onlara bir sıra imkanlar yaradır. Bu kartlar tələbələrə universitetin kitabxanasından, avadanlıqlarından və Fransada olan zaman Strasburq universitetinin yeməkxanasından istifadə etmək hüququ verir.

 

ADNSU-nun rektoru Mustafa Babanlı bildirib ki, UFAZ-da 6 həftədir dərslərə başlanıb. Rektor bildirib ki, Fransız-Azərbaycan Universiteti Fransa prezidenti Fransua Olland və Azərbaycan prezidenti İlham Əliyevin təşəbbüsü ilə yaradılıb.

 

"Gələcəkdə universitetdə magistratura və doktorantura səviyyəsi üzrə tədrisin aparılacağına ümidvarıq".