İsa Qəmbərə 180 manat pensiya təyin edilib? -Yenilənib

 Dövlət Sosial Müdafiə Fondu Azərbaycan parlamentinin sabiq sədri, Müsavat Partiyasının keçmiş başqanı İsa Qəmbərə 180 manat pensiya təyin edilməsi məsələsinə aydınlıq gətirib. 
 
Fondun mətbuat xidmətindən  bildirilib ki, İsa Yunis oğlu Qəmbərə yaşa görə pensiya deyil, yaşa görə müavinət təyin edilib.
 
"Bununla bağlı mediada dərc olunmuş məlumatla əlaqədar bildiririk ki, "Əmək pensiyaları haqqında” Qanuna əsasən pensiya yaşına çatmış şəxs 2 halda yaşa görə pensiya hüququna malik olur: fərdi hesabındakı pensiya kapitalı pensiyanın minimum məbləğindən az olmayan pensiya təminatına imkan verdikdə, həmin qədər pensiya kapitalı mövcud olmadıqda isə azı 25 il sığorta stajı olduqda.
 
İsa Qəmbərin fərdi hesabında əmək pensiyasının təyinatı üçün tələb olunan qədər pensiya kapitalının olmadığı, eyni zamanda, əmək kitabçasında sığorta stajının 25 ildən az olduğu müəyyən edilib.
 
Bu səbəbdən ona yaşa görə pensiya deyil, yaşa görə müavinət (180 manat) təyin olunub", - məlumatda qeyd olunub.

 ‐------

Müsavat partiyasının sabiq başqanı İsa Qəmbərə təyin olunan pensiyanın məbləği sosial şəbəkələrdə ciddi müzakirələrə səbəb olub.

Partiyanın sədr müavini qeyd edib ki, Azərbaycan Ali Sovetinin Milli Şurasının deputatı və sədri olmuş, həmçinin prezident səlahiyyətlərini  (17 may 1992–16 iyun 1992) icra etmiş İsa Qəmbərə yalnız yaşa görə pensiya təyin edilib.

O, həmçinin İsa Qəmbəri Avropa Şurası məkanında ən az pensiya təyin edilmiş ən yüksək vəzifəli şəxs kimi qiymətləndirib.

İqtisadçı-jurnalist Dünya Sakit isə Müsavat partiyasının başqanının yalnız yaşa görə pensiya təyin edilməsini "Azərbaycan Respublikası Milli Məclisi deputatının statusu haqqında” qanunla əlaqələndirib. O vurğulayıb ki, qanunda nəzərdə tutulan pensiya təminatı Milli Məclisin ilk üzvlərinə şamil edilməyib.