Aclıq aksiyası keçirən Zamin Salayevin səhhəti pisləşib
03.03.2023 14:00
Azərbaycan Xalq Cəbhəsi Partiyasının (AXCP) Salyan rayon təşkilatının sədri Zamin Salayevin səhhəti pisləşib. Bu barədə onun oğlu Oqtay Salayev sosial şəbəkə hesabında paylaşıb.
Zamin Salayev məhkəmənin həbs qərarına etiraz olaraq aclıq aksiyası keçirdiyini bildirib.
Oğlunun sözlərinə görə, Salayev 25 kiloqramadək çəki itirib.
"Atam artıq 25 kiloqramadək çəki itirib. Səhhəti ağırdır, dünən yenə mədəsindən qan gəlməyə başlayıb. Hələ də həkim onu müayinə etməyib. Amma, o ədalət bərpa edilənədək aclığı davam etdirəcəyini bildirdi",- Oqtay Salayev bildirib.
Onun vəkili Nemət Kərimlinin sözlərinə görə, Zamin Salayevin ailəsi və yaxınları ilə görüşünə qadağa qoyulub.
Fevralın 8-də Bakının Qaradağ rayon Məhkəməsi Zamin Salayev barədə üç ay müddətinə həbs-qətimkan tədbiri seçib.
Məlumata görə, cinayət Məcəlləsinin 221.3-cü maddəsi (xuliqanlıq - silahdan və ya silah qismində istifadə olunan əşyalardan istifadə edilməklə zərər çəkmiş şəxsə zor tətbiq olunması) ilə cinayət işi açılıb.
Zamin Salayev artıq 23 gündür ki, aclıq aksiyası keçirir.
Salayev həbsindən bir müddət əvvəl sosial şəbəkələrdə adıçəkilən polis əməkdaşıyla mübahisəsinin videosunu yaymışdı. Həmin videoda cəbhəçi fəal Əzizovu rayonda yaşayan qadına qarşı təcavüzə görə ittiham edib.
Video yayılandan sonra Salayev inzibati qaydada 30 günlük həbs olundu. O, həmin vaxt saxlanılarkən işgəncəyə məruz qaldığını, nəticədə səhhətində ciddi problemlər yarandığını bəyan edib.
Ardından polis əməkdaşı Salyan Rayon Məhkəməsində ona qarşı xüsusi ittiham qaydasında iddia qaldıraraq həbsini tələb edib.
Salayev hüquq müdafiəçiləri tərəfindən siyasi məhbus kimi tanınıb.
Aytac Zeynalova
www.anews.az
Youtube
Bizi Youtube-da izləyin
Foto
Video
