Qarabağda kəndlər sıfırdan qurulur - Xüsusi nümayəndə

Qarabağda salınan yeni kəndlər davamlı urbanizasiya və yaşıl enerji prinsipləri əsasında qurulur. Bunu Prezidentin Cəbrayıl, Qubadlı və Zəngilan üzrə xüsusi nümayəndəsi Vahid Hacıyev bildirib.

Onun sözlərinə görə, Agalı kəndi nümunəvi yaşayış məntəqəsi kimi təqdim olunur və yaxınlıqda inşa edilən Məhəmmədbəyli kəndi ilə birlikdə sakinlərə məktəb, uşaq bağçası və xidmət mərkəzlərindən ortaq istifadə imkanı verir.

Hacıyev qeyd edib ki, işğaldan azad edilən Cəbrayıl, Qubadlı və Zəngilan rayonlarında bütün evlər dağıdıldığından hər şey sıfırdan qurulur.

“Bizim əsas hədəfimiz ictimai nəqliyyat üzərində formalaşan, piyada və velosiped yolları ilə təmin olunan, ekoloji baxımdan təmiz və sağlam yaşayış mühitinin yaradılmasıdır. Aralda uşaqlar məktəbə velosipedlə gedə bilirlər,” - Hacıyev bildirib.

Onun sözlərinə görə, kəndlər əsas magistral yollar, logistika mərkəzləri və sənaye zonalarına yaxın salınır ki, bu da həm məşğulluq imkanlarını artırır, həm də yerli sahibkarlığın inkişafına təkan verir.

Hacıyev əlavə edib ki, Zəngilanda 42 MVt gücündə dörd kiçik SES, Cəbrayılda isə 240 MVt gücündə günəş elektrik stansiyası tikilib və yeni layihələr davam etdirilir. 

Ev damlarına günəş panelləri quraşdırılır.

“Əsas məqsədimiz sakinlərin öz doğma yurdlarında müasir infrastruktur, təmiz ekoloji mühit və güclü iqtisadi imkanlarla daimi məskunlaşmasını təmin etməkdir,” – o vurğulayıb.

N.Təbrizli