Azərbaycan səhiyyəsində kibertəhlükəsizliyi gücləndirmək üçün SOC mərkəzi yaradılıb

Azərbaycan səhiyyə sistemində rəqəmsallaşmanın təhlükəsizliyini təmin etmək məqsədilə yeni Təhlükəsizlik Əməliyyatları Mərkəzi (SOC) yaradılıb. Bu barədə Səhiyyə Nazirliyindən bildirilib. 

SOC mərkəzi 24/7 fasiləsiz rejimdə çalışaraq tibbi informasiya sistemlərinin, pasiyent məlumatlarının və rəqəmsal səhiyyə xidmətlərinin kibertəhlükəsizliyinə nəzarət edəcək.

Proaktiv monitorinq, kiberhücumların və informasiya təhlükəsizliyi insidentlərinin erkən aşkarlanması və operativ qarşısının alınması əsas prioritetlər sırasındadır.

Mərkəzin vəzifələrinə tibbi məlumatların konfidensiallığının və bütövlüyünün qorunması, tibb müəssisələrinin fəaliyyətini poza biləcək kiberhücumların qarşısının alınması, Səhiyyə Nazirliyinin tabeliyində olan informasiya sistemlərinin mərkəzləşdirilmiş monitorinqi və insidentlərə sürətli reaksiya mexanizmlərinin tətbiqi daxildir.

Bildirilir ki, SOC çərçivəsində Data Loss Prevention (DLP) və Identity & Access Management (IAM) kimi müasir təhlükəsizlik həllərinin tətbiqi yekunlaşma mərhələsindədir və milyonlarla pasiyentin məlumatı gücləndirilmiş nəzarət altında saxlanılır.

Nazirlik vurğulayır ki, səhiyyə sahəsində məlumat təhlükəsizliyi vətəndaşların etimadı və milli təhlükəsizlik baxımından mühüm əhəmiyyət daşıyır və yeni SOC mərkəzi ölkənin səhiyyə sisteminin kiberdavamlılığını əhəmiyyətli dərəcədə artıracaq.

Aytac