Mən heç kimə rüşvət verməmişəm - "Ağçiçəyim" şəbəkəsinin rəhbəri

Nəsimi rayonunun sabiq icra başçısı Elxan İbrahimovun “Ağçiçəyim” mağazalar şəbəkəsindən 200 min manat rüşvət istədiyinə görə vəzifəsindən azad edilməsi ilə bağlı yayılan məlumatlar təkzib edilib.

“Ağçiçəyim” mağazalar şəbəkəsinin rəhbəri Ceyhun Əliyev Manşet.az-a açıqlamasında bildirib ki, yayılan iddialar həqiqətə uyğun deyil və Elxan İbrahimov tərəfindən ondan hər hansı rüşvət tələbi olmayıb.

“Bu məlumat tamamilə yalandır. O, məndən rüşvət istəməyib, mən də onun barəsində heç bir quruma şikayət etməmişəm. O, yeni təyin olunmuşdu və bizim aramızda heç bir münasibət olmayıb”, – Əliyev bildirib.

Onun sözlərinə görə, şirkət 30 ilə yaxındır fəaliyyət göstərir və bu müddət ərzində müxtəlif icra başçıları ilə işləyib, lakin heç vaxt bu cür hallarla üzləşməyib. “Biz hər zaman dövlətə sadiq olmuşuq və dövlət tədbirlərində iştirak etmişik. Həmin şəxsin də bizə qarşı hər hansı neqativ davranışı olmayıb”, – biznesmen əlavə edib.

Elxan İbrahimov Prezident İlham Əliyevin 12 noyabr tarixli sərəncamı ilə Nəsimi Rayon İcra Hakimiyyətinin başçısı təyin olunmuş, 29 dekabrda isə vəzifəsindən azad edilmişdi.