MİDA-nın güzəştli mənzilləri ilə bağlı saxta müqavilələr hazırlayan iki nəfər həbs edilib

Azərbaycanda MİDA-nın “Güzəştli mənzil” sistemi vasitəsilə növbədənkənar mənzil əldə etməyi vəd edərək vətəndaşlardan pul almaqda şübhəli bilinən iki nəfər həbs edilib, Daxili İşlər Nazirliyi bildirib.

Nazirliyin məlumatına görə, Kibercinayətkarlıqla Mübarizə Baş İdarəsinin keçirdiyi əməliyyat nəticəsində 33 yaşlı Günay Lətifova və 43 yaşlı Şükufə Mirzəyeva saxlanılıb.

İstintaqın ilkin məlumatına görə, onlar müxtəlif süni intellekt proqramlarından istifadə edərək MİDA adından saxta elektron alqı-satqı və ipoteka müqavilələri hazırlayıb və güzəştli mənzillərin növbədənkənar alınmasını təşkil edə biləcəkləri barədə vətəndaşları aldadıblar.
DİN bildirib ki, saxta sənədlər vətəndaşlara 1,000-9,000 manat müqabilində təqdim edilib. Mirzəyevanın yaşadığı mənzildə aparılan axtarış zamanı MİDA adından hazırlanmış 472 saxta alqı-satqı və ipoteka müqaviləsi aşkarlanıb.

Faktla bağlı cinayət işi başlanıb, hər iki şəxs təqsirləndirilən şəxs qismində istintaqa cəlb olunub və məhkəmənin qərarı ilə barələrində həbs qətimkan tədbiri seçilib.

İstintaq digər mümkün zərərçəkənlərin müəyyənləşdirilməsi və dəymiş ümumi ziyanın hesablanması istiqamətində davam etdirilir.