​"Moody's": Qərbin İranla yaxınlaşması Azərbaycanın iqtisadi dividendlərini artıracaq

"Report" xəbər verir ki, "Moody's" tərəfindən açıqlanan məruzədə İranla nüvə razılaşması və iqtisadi-maliyyə sanksiyalarının aradan qaldırılması Azərbaycana qonşu ölkə - İranla xarici ticarəti artırmaq imkanı verəcəyi bildirilir. Yaranacaq ticarət və investisiya imkanları Azərbaycana, azalan neft qiymətləri səbəbi ilə ixrac gəlirlərinin azalmasının yaratdığı gərginliyi yumşaltmaq şansı yaradacaq.

"Moody's" İranın 78 mln. nəfər əhalisi və dünyanın 18-ci ən böyük iqtisadiyyatına, Orta Şərq, Fars Körfəzi Əməkdaşlıq Şurası və MDB məkanında Rusiya və Səudiyyə Ərəbistanından sonra 3-cü iqtisadiyyata sahib olduğunu qeyd edir və bunun Azərbaycan iqtisadiyyatı üçün böyük perspektivlər vəd etdiyini vurğulayır.

Agentlik, həmçinin qeyd edir ki, Azərbaycan İranla ticarət və investisiya əlaqələrini inkişaf etdirmək istəyən ilk ölkələrdən biri olub. Belə ki, 2015-ci ilin aprel ayında Azərbaycan rəsmilərindən ibarət heyət İranda bir sıra görüşlər keçirib və strateji layihələri müzakirə edib. Görüşlər əsasən neft-qaz sektorunun inkişafı ilə bağlı olub. Həmçinin görüşlərdə neft-qaz sahəsində birgə müəssisələrin yaradılması, nəqliyyat məsələləri , mühəndislik işləri müzakirə edilib. Səfər zamanı İranın Cənub Qaz Dəhlizinə marağı vurğulanıb, Şimal-Cənub dəmir yolu xətti və Azərbaycan-İran sərhədində su elektrik stansiyasının inşası məsələləri də müzakirə olunub.

"Moody's" həmçinin bildirir ki, Azərbaycan iqtisadiyyatının 2014-cü ildə 37%-i , ixracın 90%-i neft-qaz sektoruna aid olub. İranla əlaqələrin inkişaf etdirilməsi Azərbaycanın qeyri-neft sektorunun inkişafına töhfə verəcək. Bununla da Azərbaycan neftdən asılılığını bir qədər də azaltmağa müvəffəq olacaq. Agentlik, həmçinin qeyd edir ki, Azərbaycan-İran əlaqələrinin inkişafı İrandan 25-ə yaxın Asiya ölkəsinə açılan yolu qısaldacaq və ölkənin gəlirlərini artıracaq.

Məruzədə İranla 6-lıq ölkələrinin son razılığa gəlməsi və sanksiyaların qaldırılmasının ən tez 2016-cı ilin ilk rübündə baş verməsi ehtimal olunur.