Azərbaycanda iki yeni komitə yaradılır

Standartlaşdırma, Metrologiya və Patent üzrə Dövlət Komitəsinin nəzdində iki yeni texniki komitə yaradılacaq.

ANN.Az xəbər verir ki, bunu komitənin aparat rəhbəri Arif Əşrəfov qeyri-neft sektorunun və sahibkarlığın inkişaf etdirilməsi üçün keyfiyyət infrastrukturu sahələrində aparılan islahatlara həsr olunmuş mətbuat konfransında deyib.

Aparat rəhbərinin sözlərinə görə, komitənin nəzdində 9 texniki komitə fəaliyyət göstərir: "Hazırda enerji səmərəliliyi və yol nəqliyyatının tənzimlənməsi ilə bağlı yeni iki texniki komitənin yaradılması istiqamətində iş aparılır. Yeni yaradılacaq komitələr bu ilə fəaliyyətə başlayacaq.”

Arif Əşrəfov daha sonra əlavə edib ki, Standartlaşdırma, Metrologiya və Patent üzrə Dövlət Komitəsində Apellyasiya Şurası yaradılıb.

Şuraya A.Əşrəfov rəhbərlik edəcək. Şuranın tərkibinə 6 nəfər daxildir.

Orxan Aslanlı