Azərbaycanın unikal meşə massivi məhv edildi

İstiPress-ə Nazirliyin mətbuat xidmətindən verilən məlumata görə, reyd zamanı Neftçala rayonu Xəzər bələdiyyəsinin mülkiyyətinə aid torpaq sahəsində 114 ədəd yulğun kolunun kökdən çıxarılaraq məhv edildiyi, 588 m3 həcmində qumun qazılaraq aparıldığı, 600 m3 həcmində münbit torpaq qatının korlandığı aşkar edilib. Araşdırma zamanı təbiətə 50869,84 manat məbləğində ziyan dəydiyi məlum olub.

Faktla bağlı Xəzər bələdiyyəsi barəsində akt tərtib olunub. Dəymiş ziyanın məbləği cinayət tərkibi yaratdığından qanun pozuntusu ilə bağlı toplanmış materiallar məsələyə hüquqi qiymət verilməsi və təqsirkarlar barəsində qanuna müvafiq tədbirlərin görülməsi üçün Azərbaycan Respublikası Baş Prokurorluğuna göndərilib.

Qeyd edək ki, yulğun kolları Azərbaycanın unikal Tuqay meşələrində rast gəlinir. Yulğunlar adətən bu meşələrin sonuncu ağacları kimi duruş gətirirlər. Yulğunlar tükəndikdən sonra zona ekoloji fəlakət bölgəsinə çevrilir.