Peter Siyarto - Macarıstan Xəzər qazında maraqlıdır

"Macarıstan Rusiya qazına qoyulan sanksiyalarla razılaşa bilməz, çünki ölkənin onlara böyük ehtiyacı var. Arzu edirik ki, Xəzər qazı mərkəzi Avropada reallığa çevrilsin. Lakin bunu həyata keçirmək üçün ciddi investisiyalar lazımdır", - Macarıstan rəsmisi deyib.

 

Macarıstan "Qazprom" ilə imzaladığı 15 illik tədarük müqaviləsi çərçivəsində Rusiyadan hər il 4,5 milyard kubmetr təbii qaz idxal edir.
Rusiya qazının dost olmayan ölkələrə rublla satılması üçün yeni sistem aprelin 1-dən etibarən qüvvəyə minib. Bu səbəbdən Macarıstan da qazı rublla almağa davam edir.

Macarıstan Azərbaycan qazının qəbul edilməsində maraqlıdır. 2021-ci il martında Azərbaycanın xarici işlər naziri Ceyhun Bayramovla görüşdən sonra  Siyarto bildirib ki, Macarıstanın qaz boru xətləri Serbiya qaz kəmərləri ilə birləşəcək.

Macarıstanın Cənub Qaz Dəhlizindən qaz alması vacibdir. "Azərbaycan qaz istehsalını artıra da bilər. Bunun nəticəsində biz əhəmiyyətli miqdarda qaz ala və 2023-2024-cü illərdə Azərbaycan qazından asılı ola bilərik. Hətta SOCAR-la da danışıqlara başlanılıb ki, lazımi kəmərlər tikilsin", - nazir demişdi.

Azərbaycan qazı Avropaya Trans-Adriatik qaz kəməri (TAP) ilə nəql edilir. Cənub Qaz Dəhlizinin 878 kilometrlik hissəsində qaz xətti (TAP) ilə "mavi yanacağın" kommersiya məqsədli nəqlinə 2020-ci il dekabrın 31-də başlanılıb.

 

Ləman Qasımova