Ceyhan terminalından yola salınan tankerlərin sayı 4950-dir

 

2022-ci ilin ilk 6 ayında Xəzər dənizindən çıxarılan nefti dünya bazarlarına nəql edən Bakı-Tbilisi-Ceyhan (BTC) Xam Neft Kəmərinin Adanadakı dəniz terminalından 106 milyon 982 min 579 barel xam neft yola salınıb. 

Ceyhandakı Heydər Əliyev Dəniz Terminalına çatan xam neft BTC xəttinin Türkiyə hissəsini idarə edən BOTAŞ International (BIL) tərəfindən tankerlərlə dünya bazarına çıxarılır.

Dəniz terminalından istismara verildiyi ildən ( red. 2006-cı ildən) ötən ilin sonunadək 4 min 947 tankerlə 3 milyard 777 milyon 227 min 567 barel neft dünya bazarına çıxarılıb.

Bu ilin yanvar-iyununda 148 tankerlə 106 milyon 982 min 579 barel xam neft daşınıb.

İlin ilk 6 ayında ən çox nəql 20 milyon 479 min 706 barellə mayda, ən az daşınma isə 13 milyon 581 min 125 barellə fevralda həyata keçirilib.

Türkiyənin BOTAŞ (Boru Hatları İle Petrol Taşıma Anonim Şirketi) şirkəti neft və təbii qaz layihələrində söz sahibi olan ölkələrin və transmilli şirkətlərin fəaliyyətlərində iştirak etmək məqsədi ilə 3 iyul 1996-cı ildə təsis edilmiş və 2001-ci ildə BTC-nin istismarına həvalə edilmişdir.

2006-cı il iyunun 2-də Ceyhan Dəniz Terminalından xam neftin tankerlərə yüklənməsinə başlayan BTC-də Xəzər dənizindən çıxarılan neft boru kəməri ilə Gürcüstan vasitəsilə Ceyhandakı dəniz terminalına, oradan isə tankerlərlə dünya bazarlarına nəql edilir. Uzunluğu 1776 kilometr olan xəttin gündəlik neft daşıma qabiliyyəti 1 milyon barel, ildə isə 50 milyon ton neftdir.

Xəttin Türkiyə hissəsi boyunca Ərdahan, Ərzurum, Ərzincan və Sivasda 4 nasos stansiyası, Qars və Kahramanmaraşda 2 təzyiq tənzimləmə stansiyası və 52 blok klapan stansiyası var.

Ceyhan Dəniz Terminalından hər birinin diametri 100 metr, hündürlüyü 20 metr, anbar tutumu bir milyon barel olan 7 neft çəni, idarəetmə otağı, ölçmə məntəqəsi və estakada yükləmə qurğuları mövcuddur.