Hökumət hara nə qədər xərcləyəcəyini proqnozlaşdıra bilmir - millət vəkili - VİDEO

Hökumət hara nə qədər xərcləyəcəyini proqnozlaşdıra bilmir. Bunu millət vəkili Qüdrət Həsənquliyev bildirib. 
 
"2022-ci ildə 99 layihə üzrə 287, 1 milyon məbləğində maliyyələşmə, ümumiyyətlə açılmayıb. Burada büdcə qalığı 4 milyarda çatır. Bu da onu göstərir ki, büdcə əvvəlcədən proqnozlaşdırıla bilmir”, - Milli Məclisin deputatı Qüdrət Həsənquliyev Milli Məclisin bu gün keçirlən plenar iclasında 2023-cü ilin büdcə layihəsinin müzakirəsi zamanı bildirib. 
 
Millət vəkili qeyd edib ki, büdcə sistemi qanununun 12.1.4 maddəsinə görə  dövlət büdcəsinin vəsaiti hesabına maliyyələşdirilməsi nəzərdə tutulan məqsədli proqramların siyahısı ayrıca sənəd formasında Milli Məclisə  təqdim olunmalı olsa da, bu yerinə yetirilmir. O cümlədən, investisiya layihələrinin sahələr və istiqamətlər üzrə ümumi məbləğini özündə əks etdirən investisiya proqramlarının layihəsində də xərclərin  istiqamətlər üzrə bölgüsü açıqlanmır.
 
"Bunun üçün büdcənin gəlirlərini hesablamaq barədə düşünmək lazımdır. Azərbaycanın büdcəsinin gəlirləri 30 milyard 720 milyon manatdır. Hesab edirəm ki, bu çox azdır. Bunun 11 milyarddan çoxu Neft Fondundan transfertdi. Gəlirlərin 53%-i isə neft sektorunun payına düşür”, - Həsənquliyev vurğulayıb.
 

www.anews.az