AYİB 2022-ci ildə Azərbaycanda ÜDM artımını 4,5% proqnozlaşdırıb

 

"Enerji qiymətləri və Azərbaycan qazına tələbat qısa müddətdə yüksək olaraq qalacaq və bu, ümumi iqtisadi vəziyyəti dəstəkləyəcək. Beləliklə, biz 2022-ci ildə ÜDM-in 4,5%-lik  artımını, lakin 2023-cü ildə 2,5%-ə qədər bir qədər yavaşlamasını gözləyirik. İqtisadiyyat üçün əsas risklər inflyasiya, enerji qiymətlərinin potensial düşməsi və iqtisadiyyatdakı struktur zəiflikləri ilə bağlıdır. Bununla belə, yaxın illərdə Azərbaycan qaz sənayesinə əlavə investisiyalardan faydalana bilər, çünki Avropa İttifaqı Rusiya qazından əlavə idxalçılar tapmağa  çalışır”, - hesabatda qeyd olunub.

AYİB-in proqnozlarına əsasən, yüksək neft və qaz qiymətləri səbəbindən 2022-ci ildə Azərbaycanın tədiyə balansının cari əməliyyatlar hesabının profisiti ÜDM-in 31,7%-ni (2021-ci ildə ÜDM-in 15,2%-i) təşkil edəcək.

AYİB-in fikrincə, Azərbaycanın 2023-cü il üçün prioritetləri iqtisadiyyatın davamlılığını artırmaq üçün onun daha da şaxələndirilməsi siyasətini davam etdirmək,  dövlətin iqtisadiyyatda iştirakının azaldılması olmalıdır.

 

"Maliyyə sektorunun xarici investisiyalar üçün açılması maliyyəyə çıxış imkanlarını yaxşılaşdıracaq , kiçik və orta müəssisələrin investisiya fəaliyyətinə dəstək verəcək”, - bankdan bildirib.

Bundan əlavə, bank Azərbaycan hakimiyyətinə korrupsiyaya qarşı mübarizəni gücləndirməyi tövsiyə edir və bu ilin aprelində 2022-2026-cı illər üçün Korrupsiyaya Qarşı Mübarizə üzrə Milli Strategiyanın qəbul edilməsini və yaşıl enerji istehsalını artırmasını alqışlayıb. 

Azərbaycan hökuməti 2022-ci ildə ÜDM artımını 3,5%, 2023-cü ildə isə 2,7% səviyyəsində proqnozlaşdırıb.

 

Bu il orta illik inflyasiya 12,5% səviyyəsində gözlənilir.

2021-ci ildə Azərbaycanda ÜDM artımı 5,6%, inflyasiya 6,7% təşkil edib.