“Azərkosmos” 2022-ci ildə xalis mənfəətini 10 dəfə azaldıb

Agentliyin 2022-ci il üzrə açıqlanan maliyyə hesabatlarına əsasən, "Azərkosmos”un gəlirləri 49,5 milyon manat (azalma 14,4%) təşkil edib. "Azərkosmos”un 2022-ci ildə gəlirləri əsasən peyk xidmətlərinin ixracından formalaşıb.

Ümumilikdə, 2022-ci ildə şirkətin əməliyyat gəlirləri 4,4 milyon manat (azalma 39,7%) təşkil edib.

2022-ci ildə "Azərkosmos”un aktivləri 8,3% azalaraq 508,6 milyon manat olub.

Hesabat ilində agentliyin öhdəlikləri 30,6% azalaraq 362,06 milyon manat təşkil edib. Bununla yanaşı, 2022-ci ildə layihələrin icrası üçün verilmiş kreditlər üzrə borc 6,3 dəfə azalaraq 31,17 milyon manat təşkil edib. 

2022-ci ildə "Azərkosmos”un kapitalı 4,5 dəfə artıb. O cümlədən agentliyin nizamnamə kapitalı 61% artaraq 272 milyon 605,88 min manata çatıb.

"Azərkosmos” 2010-cu ildə yaradılıb. Onun funksiyalarına peyklərin orbitə çıxarılması, telekommunikasiya xidmətlərinin göstərilməsi, xidmətlərin alınması üçün sığorta şirkətlərinin seçilməsi, kosmik (peyk) operatorlar ilə əməkdaşlığın qurulması və bu istiqamətdə müxtəlif tədqiqatların aparılması daxildir.