Geri qaytarılmayan büdcə ssudaları Təminat Fondu hesabına ödəniləcək

Milli Məclisdə “Dövlət borcu haqqında” Qanuna təklif olunan dəyişikliklər ikinci oxunuşda müzakirə edilərək qəbul edilib. Dəyişikliklərə əsasən, dövlət büdcəsindən verilən, lakin geri qaytarılmayan büdcə ssudaları Təminat Fondu hesabına ödəniləcək. Bu barədə deputat Vüqar Bayramov sosial media hesabında məlumat verib.

Dəyişikliklərə əsasən, Naxçıvan Muxtar Respublikasına, yerli büdcələrə, publik hüquqi şəxslərə və digər dövlət qurumlarına ayrılan və vaxtında qaytarılmayan ssudaların ödənilməsi dövlət zəmanəti ilə bağlı Təminat Fondu tərəfindən həyata keçiriləcək.

Bayramov qeyd edib ki, mövcud təcrübədə ssudaların geri qaytarılmasında problemlər müşahidə olunur. Yeni mexanizm Təminat Fondunun funksiyalarını genişləndirərək, bu hallarda dövlət maliyyə sisteminə əlavə dayanıqlıq qazandıracaq.

Qanunvericiliyə görə, ssuda dövlət tərəfindən müəyyən müddətə və qaydada verilən borc vəsaitidir və büdcə ili ərzində geri qaytarılmalıdır.