Moody's Azərbaycanın kredit reytinqini investisiya səviyyəsinə yüksəldib

Moody’s Ratings beynəlxalq reytinq agentliyi Azərbaycan Respublikasının suveren kredit reytinqini “Ba1” səviyyəsindən “Baa3” səviyyəsinə yüksəldib və proqnozunu “müsbət” kimi dəyərləndirib. Bu barədə Maliyyə Nazirliyinin yaydığı məlumatda qeyd olunur.

Hesabat iyulun 4-də dərc olunub və ölkənin uzunmüddətli borc sabitliyini, valyuta ehtiyatlarını və borc yükünün idarəolunan səviyyədə olmasını əsas götürür.

İyunun 13-də isə digər beynəlxalq reytinq agentliyi Fitch Ratings Azərbaycanın kredit reytinqini “BBB-” səviyyəsində təsdiqləyib, proqnozu isə “sabit” kimi saxlayıb.

S&P Global Ratings isə iyunun 6-da verdiyi qiymətləndirmədə Azərbaycanın reytinqini “BB+/B” səviyyəsində müəyyən edib və proqnozu da “sabit” olaraq dəyərləndirib.

Azərbaycanın kredit reytinqi beynəlxalq bazarlardan borclanma imkanlarına və investor etimadına birbaşa təsir göstərir. 

Ölkə hazırda üç əsas reytinq agentliyi – Fitch Ratings (2000-ci ildən), Moody’s (2006-cı ildən) və S&P Global Ratings (2008-ci ildən) ilə əməkdaşlıq edir.

Gülnar Nazimqızı