Süni intellekt həm də təhdid vasitədi kimi sürətlə inkişaf edir - Deputat

Süni intellekt texnologiyaları təhlükəsizlik sahəsində həm təhdid, həm də müdafiə vasitəsi kimi sürətlə inkişaf edir. Bunu Milli Məclisin Xarici Müdaxilələrə və Hibrid Təhdidlərə Qarşı Komissiyasının sədri Ramid Namazov bildirib.

Namazovun sözlərinə görə, avtomatlaşdırılmış təhdid aşkarlama, proaktiv müdafiə sistemləri və intellektual cavab mexanizmləri yaxın illərdə qlobal təhlükəsizlik arxitekturasının əsasını təşkil edəcək.

Deputat qeyd edib ki, yeni nəsil rabitə texnologiyaları daha sürətli və etibarlı əlaqə imkanı yaratsa da, eyni zamanda yeni təhlükəsizlik çağırışları doğuracaq və bu da hibrid müharibə konsepsiyasını daha da mürəkkəbləşdirəcək.

"Ağıllı şəhər infrastrukturunun inkişafı təhlükəsizlik mülahizələri ilə paralel aparılmalı, milli kibertəhlükəsizlik strategiyası isə daim yenilənərək qabaqcıl beynəlxalq təcrübəyə uyğunlaşdırılmalıdır.Gələcəkdə müharibələrin böyük ehtimalla şəhər məkanlarında və kiberməkanda aparılması gözlənilir və bu reallığa hazırlıq yalnız texnoloji deyil, həm də sosial, institusional və mədəni transformasiya tələb edir",- o İnformasiya Təhlükəsizliyi jurnalında bildirib.

Azərbaycan son illərdə kibertəhlükəsizlik infrastrukturunu gücləndirmək, süni intellekt və rəqəmsal texnologiyaların təhlükəsiz tətbiqini təmin etmək üçün milli strategiyalar üzərində işləyir. Parlamentin yeni yaradılmış komissiyası xarici müdaxilələr, dezinformasiya və hibrid təhdidlərə qarşı qanunvericilik və institusional mexanizmlərin formalaşdırılmasını hədəfləyir.

Azərbaycanda ikinci dəfə “Critical Infrastructure Defence Challenge 2025” (CIDC-2025) kiberfestivalı keçirilir. Konfransda daxili işlər naziri Vilayət Eyvazov və bir sıra rəsmilər iştirak edir.

Gülnar Nazimqızı