2026-cı ildə İşsizlikdən Sığorta Fondunun gəlirləri 238 milyon manata çatacaq

İşsizlikdən Sığorta Fondunun (İSF) 2026-cı il üzrə gəlirləri 238,3 milyon manat həcmində proqnozlaşdırılır ki, bu da 2025-ci ilin təsdiqlənmiş göstəricisindən 31,9 milyon manat və ya 15,5% çoxdur. Bunu əmək və əhalinin sosial müdafiəsi naziri Anar Əliyev 2026-ci ilin dövlət büdcəsi haqqında qanuna münasibət bildirərkən deyib.

Nazirin sözlərinə görə, fondun gəlirlərinin 99,3%-i (236,6 milyon manat) işsizlikdən sığorta haqları üzrə yığımlardan formalaşacaq. Bu yığımların 78%-i qeyri-büdcə sektorunun payına düşəcək və bu, cari illə müqayisədə 28,1 milyon manat çoxdur.

Fondun gəlirlərinin 10,5%-lik hissəsi (28,1 milyon manat) isə əvvəlki illərdə yaradılmış ehtiyatlardan növbəti ilin xərclərinin maliyyələşdirilməsinə yönəldiləcək.

2026-cı il üzrə İSF-nin ümumi xərcləri 266,4 milyon manat təşkil edəcək — bu da cari ilin təsdiqlənmiş göstəricisindən 5,7 milyon manat və ya 2,2% çoxdur.

Nazir əlavə edib ki, 2026-cı ildə fond vəsaiti hesabına 450 minə yaxın şəxsin aktiv məşğulluq proqramlarına cəlb olunması planlaşdırılır.

Gülnar Nazimqızı