Prezident Vergi Məcəlləsinə və “Gömrük tarifi haqqında” Qanuna dəyişiklikləri təsdiqləyib

Prezident İlham Əliyev Vergi Məcəlləsində və “Gömrük tarifi haqqında” Qanunda dəyişiklik edilməsi barədə Qanunu təsdiqləyib.

Dəyişikliklərə əsasən, İqtisadiyyat Nazirliyi yanında İqtisadi Zonaların İnkişafı Agentliyinin tabeliyindəki Qaradağ Sənaye Parkının rezidenti – “Bakı Gəmiqayırma Zavodu” MMC üçün vergi və gömrük güzəştlərinin müddəti artırılıb.

Yeni qaydaya əsasən, sənaye parkının rezidentləri 2025-ci il yanvarın 1-dən etibarən 6 il müddətinə sənaye parkındakı fəaliyyətlərindən əldə etdikləri mənfəətə görə mənfəət vergisindən azad edilirlər.

Bundan əlavə, həmin fəaliyyət çərçivəsində istifadə olunan əmlak və torpaqlara görə də rezidentlər 6 il müddətinə əmlak və torpaq vergisindən azad olunacaqlar.

Eyni zamanda, sənaye parkının rezidentləri tərəfindən müvafiq icra hakimiyyəti orqanının təsdiqedici sənədi əsasında fəaliyyət məqsədləri üçün idxal edilən bütün növ mallar 2016-cı il mayın 1-dən etibarən 14 il müddətinə gömrük rüsumundan azad edilir.

İndiyədək bu müddət 10 il idi.