Azərbaycanda sənaye istehsalı azalıb

Azərbaycan sənaye müəssisələri və fərdi sahibkarlar 2025-ci ilin on ayında 52,6 milyard manatlıq sənaye məhsulu istehsal edib ki, bu da 2024-cü ilin eyni dövrü ilə müqayisədə 1,2% azdır. Bu barədə Dövlət Statistika Komitəsinin on aylıq hesabatında qeyd olunub. 

On ayda məhsul buraxılışı neft-qaz sektorunda 2,2% azalıb, qeyri-neft-qaz sənayesində 4,9% artıb.

Hesabat dövründə sənaye istehsalının 60,8%-i mədənçıxarma, 32,8%-i emal, 5,4%-i elektrik enerjisi, qaz və buxar istehsalı və paylanması, 1%-i isə su təchizatı və tullantı emalı sektorlarının payına düşüb. Sənayedə qeyri-dövlət sektorunun payı 79,3% təşkil edib.

Ümumi sənaye istehsalının 88,5%-i məhsul istehsalı, 11,5%-i isə sənaye xarakterli xidmətlər hesabına formalaşıb.

Gülnar Nazimqızı