Azərbaycan Milli Hidrogen Strategiyasının tətbiqi üzrə ikinci mərhələyə start verir

Energetika Nazirliyində Azərbaycan Milli Hidrogen Strategiyasının tətbiqi ilə bağlı İşçi Qrupun və “DNV Energy Systems Germany GmbH” şirkətinin nümayəndələrinin iştirakı ilə iclas keçirilib. Nazirlikdən verilən məlumata görə, görüşdə strategiyanın icra mərhələləri və prioritet istiqamətlər müzakirə olunub.

Energetika nazirinin müavini Elnur Soltanov bildirib ki, Azərbaycan hidrogen istehsalı üçün əhəmiyyətli potensiala malikdir. Onun sözlərinə görə, “Azərbaycan Milli Hidrogen Strategiyasının və onun Tətbiqi Planının Hazırlanması” layihəsinin birinci mərhələsi çərçivəsində “Hidrogen üzrə Milli Strateji Baxış” sənədi Avropa Yenidənqurma və İnkişaf Bankının (AYİB) texniki dəstəyi ilə hazırlanaraq COP29 konfransı zamanı təqdim edilib.

Nazir müavini qeyd edib ki, layihənin ikinci mərhələsinin icrasına başlanılması məqsədilə AYİB-in dəstəyi ilə keçirilən tenderin nəticələrinə əsasən “DNV Energy Systems Germany GmbH” şirkəti qalib elan olunub. Tətbiq planının 2026-cı ilin birinci yarısında hazır olması nəzərdə tutulur.

İclasda şirkətin nümayəndəsi İlka Levinqton Milli Hidrogen Strategiyasının tətbiqi ilə bağlı təqdimatla çıxış edib. Müzakirələr zamanı Azərbaycanda hidrogen istehsalının hüquqi, institusional və texniki aspektləri nəzərdən keçirilib.

Tərəflər növbəti mərhələ üzrə prioritet istiqamətləri, eləcə də İşçi Qrup qarşısında duran konkret hədəflər və icra olunacaq tapşırıqlar üzrə razılıq əldə ediblər.