İsrail İranın BTC kəmərinə hücum planının qarşısının alındığını bildirib -Reuters

İranın Azərbaycandan Aralıq dənizinə neft daşıyan kəmərə, həmçinin Azərbaycandakı İsrail və yəhudi hədəflərinə hücum planlaşdıran şəbəkəsi ifşa olunub. Bu barədə Reuters Agentliyi Mossad və Şin Bet kəşfiyyat xidmətlərinin birgə bəyanatına əsasən xəbər verib. 

Mossad və Şin Bet kəşfiyyat xidmətləri birgə bəyanatda bildiriblər ki, bir neçə həftə əvvəl İranın İslam İnqilabı Keşikçiləri Korpusunun Gürcüstan və Türkiyə üzərindən keçən Bakı-Tbilisi-Ceyhan neft kəmərinə hücum planının qarşısı alınıb.

Bəyanata görə, qrup həmçinin Azərbaycandakı İsrail və yəhudi hədəflərinə, o cümlədən Bakıda İsrail səfirliyinə, sinaqoqa və yəhudi icmasının rəhbərlərinə qarşı hücumlar planlaşdırıb.

Reuters qeyd edir ki, İran Xarici İşlər Nazirliyi şərh sorğusuna dərhal cavab verməyib.

Bəyanatda deyilir ki, Azərbaycan hakimiyyəti partlayıcı dronlar və qəlpəli yüklərlə silahlanmış qrup üzvlərini saxlayıb.

İsrail xüsusi xidmət orqanlarının bildirdiyinə görə, şəbəkəyə İran İİKK kəşfiyyatının Xüsusi Əməliyyatlar Bölməsi — Unit 4000-in rəhbəri kimi təqdim edilən Rəhman Moqadam başçılıq edib.

N.Təbrizli