Rauf Namazov: "Maliyyə institutları yenilikləri tətbiq edərkən riskləri öncədən hesablamalıdır"

Hazırda maliyyə institutları bazardakı rəqabətə tab gətirmək üçün yeni texnoloji yenilikləri bəzən riskləri dərindən qiymətləndirmədən tətbiq etməyə çalışırlar ki, bu da həm qurumların özlərinə, həm də vətəndaşlara ciddi zərər vura bilir. Bunu Maliyyə Monitorinqi Xidmətinin Aparat rəhbəri Rauf Namazov bildirib.

"Maliyyə institutlarını yeni alətlərin tətbiqi zamanı tənzimləyici orqanlarla geniş müzakirələr aparmağa və beynəlxalq tendensiyaları yaxından izlənməlidir. Məlumatların düzgün və vaxtında ötürülməməsi əsas risklərdən biridir və maliyyə institutları daxili nizam-intizam qaydalarına riayət edərək şübhəli əməliyyatlar haqqında hesabatları müəyyən edilmiş limitlər daxilində operativ şəkildə təqdim etməlidirlər",- o bildirib.

O qeyd edib ki, artıq qurumun yeni proqram təminatı olan Şübhəli Məlumatların Monitorinq Sistemi tətbiq olunmağa başlanıb və maliyyə institutları artıq bu sistemdən aktiv şəkildə istifadə edərək hesabatlarını göndərirlər. Yeni proqramın əsas üstünlüklərindən biri kimi, əvvəlki sistemlərdə mövcud olmayan və istifadəçilərin işini əhəmiyyətli dərəcədə asanlaşdıran elektron kabinetlərin yaradılması nəzərdə tutulub.

Aytac Zeynalova